गजल

गजल
~~~~
जिम्माल बा र मुखियाको तिर्न बाँकी छ
डाडाँ लाहुरेनी बुढियाको तिर्न बाँकी छ

बैदारको काले कोदो,सुक्दारको मुरी मकै
गत सालको अँधियाको तिर्न बाँकी छ

रणेसाहु घरको ऋणले पनि भाका नाघ्यो
कचकच गर्छ चुतियाको तिर्न बाँकी छ

जग्गाजमिन बन्धकिमा,सुनचाँदी धितोमा
साँवा व्याज रुपियाको तिर्न बाँकी छ

प्रधानको पन्ध्रसय,ठालूबाको आठ लाख
चारैतिर दुनियाको तिर्न बाँकी छ।।

-गोविन्द पुन `गिरीश'
भूमे-9,चुन्वाङ रुकुम(पूर्व)